🌍 دونیا بیوچئشیدلیلیک گونو: بیوچئشیدلیلیک و اوشاقلارین گله‌جه‌گی
مای آیینین ۲۲ـسی دونیا بیوچئشیدلیلیک گونودور.
بیوچئشیدلیلیک نه‌دیر؟
بیتکی‌لر، حیوان‌لار، گؤبلک‌لر، میکرواورقانیسم‌لر و باشقا جانلیلار، هامیسی، و بونلارین اولوشدوردوقلاری ائکوسیستم‌لر و یاشادیقلاری ساحه‌لره «بیولوژی چئشیدلیلیک» دئییلیر.
بیوچئشیدلیکلیک و اوشاقلارین گله‌جه‌گی
۱. ساغلیقلی یئمک: بیوچئشیدلیلیک اوشاقلارین ساغلیقلی بسلنمه‌لری اوچون گرکلی اولان بیتکی و حیوان منشالی چئشیدلی یئمک‌لری ساغلایار.
۲. تمیز سو: بیوچئشیدلیلیک سویون آریدیلماسیندا و تمیز سویون تأمینینده اؤنملی رول اوینایار.
۳. دایانیقلی‌لیق: بیوچئشیدلیلیک اقلیم ده‌ییشمه‌سی و طبیعی فلاکت‌لر قارشیسیندا دایانیقلیلیغی آرتیرار.
۴. خسته‌لیک‌لردن قورونما: بیوچئشیدلی‌لیگین ایتیریلمه‌سی، بولاشیجی خسته‌لیکلرین آرتماسینا سبب اولا بیلر.
۵. درمان‌لار: اوشاقلار و ائله‌جه ده بؤیوک‌لر اوچون لازم اولان درمانلارین چوخونو بیتکی‌لره، گؤبلک‌لره و باشقا جانلی‌لارا بورجلویوق.
۶. روحی-جسمی ساغلیق: اوشاقلارین طبیعت‌ده‌کی بیولوژی چئشیدلیلییی گؤرمه‌یه و ساغلام بیر طبیعت‌ده یاشاماغا احتیاجلاری واردیر.
اوخوجان تیمی اولاراق، بیوچئشدلیلیگین قورونماسی‌نین اؤنمینی و ده‌یرینی وورغولاماق و اوشاقلاری جانلیلار و طبیعت‌له تانیش ائتمک هدفی ایله، دونیا بیوچئشیدلیلیک گونو مناسبتی ایله بیر سسلندیرمه یاریشی کئچیردیک.
بو سسلندیرمه‌یه ۸ اوشاق و یئنی‌یئتمه قاتیلیب وئریلن متنی سسلندیردیلر.
💎 قاتیلانلارین سایی آز اولسا دا، هر بیرینین ایشی چوخ ده‌یرلی ایدی.
بونا گؤره ده، دیل معلم‌لری، ادبیات، سس و موسیقی ساحه‌سینده چالیشان ۶ عزیز استاددان یاریشمامیزا حکملیک ائتمه‌لرینی ایسته‌دیک و حکملرین نظرلرینی توپلادیق.
نتیجه‌لر بیربیرینه چوخ یاخین ایدی و اوشاقلارین هر بیرینین سعیی تقدیره لایق‌دیر.
بو سبب‌لردن دولایی، سسلندیرمه‌ده اشتراک ائدن عزیز بالالاریمیزین هامیسی بیرینجی‌لیگی قازانمیشدیر.
بو عزیز بالالاریمیزین هر بیری متنین بعضی یئرلرینی چوخ گؤزل و دوزگون اوخویوبلار آمما یئنه ده هر بیرینین بعضی یئرلرده سهولری واردیر کی، بو دا طبیعی و نورمال‌دیر؛ چونکی آنا دیل‌لرینده تحصیل آلماییبلار.
بو سسلندیرمه‌لردن یارارلاناراق تک بیر ویدئوکتاب حاضرلادیق و بئله‌لیکله، بو یاریشمایا قاتیلانلارین هامیسی بیر ویدئوکتابی بیرگه سسلندیرمیش اولدولار.
❤️ اونوتمایاق کی، بو کیمی یاریشمالاردا هدف بیرینجی‌لیگی یا دا نئچه‌نجی‌لیگی قازانماق دئییل، آنا دیلیمیزی و بیرگه چالیشماغی اؤیرنمک‌دیر.
بو چالیشمایا قاتیلان دوستلاریمیز:
🎙 ثنا رحیمی
🎙 ائلشاد غلامی
🎙 کیمیا اسکندرنیا
🎙 سلین اکبری
🎙 آیسو جوانی
🎙 آیتار سلطانی
🎙 سئوین نصرتی
🎙 سو عزمی‌حسن‌پور
تلگرام کانالیمیزدا سسلری آیری-آیری دینله‌یه بیلرسینیز.
کامئنت‌لر
چوخ گوزل بیر ایش اولدو هم اوخویانلار هم ویدوئو کیتابی حاضیرلایانلار ساغول سونلار❤️❤️